رسالة ١٣-- دنيا

صحيت النهاردة الساعة 7.20 صباحاً عرفة إن دة شئ طبيعي وعادي لمعظم الناس.. بس بالنسبة لي رجعت على الأقل 14 سنة للوراء، أيام المدرسة أما كنت بصحى في الظلام وأسمع العصافير وهي بتزأزأو أبقى مش هاين علي أسيب السرير في البرد ده.. الدنيا ضلمة.. أقوم ليه ؟
صحيت ولبست وأخدت تفاحتي ورحت أتمشى للاوتوبيس , طبعاً ومحسن كان قاعد يسربعني عشان أنا متأخرة وصلت في معادي بالظبط، بدري أقل من دقيقة، وقلت في بالي والله معك حق يا محسن ! كان هيفوتني الاوتوبيس.

لقيت الناس واقفة طابور طويييل عشان أما الاوتوبيس يجي يدخلو بالدور ! طبعاً أيام المدرسة كنا بنبقة كبشة بنات واقفة، وبنطلع كدة الاوتوبيس, وعند الباب بقى نتصرف ! وساعات وحنا مروحين كنا بنتخانق مين يدخل الأول .... دنيا!!

المهم، طلعت في دوري الاوتوبيس ولقيتني بقول للسواق "جود مورننج" تلقائياً.. ركزت لمدة ثانية كدة وقلت في بالي إيه ده
 أيام المدرسة كانت صباح الخير.... جود مورننج ممم ... دنيا !!

اخترت كرسي جمب الشباك وقعدت اتفرج على الناس إلي في الشارع, مش عرفة ليه حسيت بالنشاط أما شفتهم و حسيت إن طبيعي اني أبقى في شارع دلوقتي مش فالسرير...قعدت أفكر كم واحد صحي زي في الضلمة وكم واحد لسة صحي ولبس بسرعة.. ومين نزل رايح شغله ومن رايح مشوار...
قعدت أسلي نفسي شوية كدة لحد أما ركزت إن السواق فاتح الراديو...
لقيته فاتح "بي بي سي  راديو كامبردج" فين برنامج الصباح واغنية يا صباح الخير يلي معنا ؟؟

ابتسمت جوية وأنا لسة ماسكة التفاحة وقلت : دنيا !